जनकपुरमा भएको १३ औँ दक्षिण एशियाली खेलकुद (साग) उद्घाटनको क्रममा छाडिएको पटाका विस्फोट हुँदा गम्भीर घाइते भएका बालकको उपचारको क्रममा मृत्यु भएको छ।
कुस्ती खेल भएको जनकपुरधाम उपमहानगरपालिका १३ स्थित कबर्ड हलनजिकै घर भएका निर्मला राउतका घाइते १० वर्षीय छोरा आलोक राउतको मृत्यु भएको जिल्ला प्रहरी कार्यालय धनुषाले जनाएको छ। बालक राउतको सुनसरीको धरानस्थित बिपी कोइराला मेमोरियल अस्पतालमा उपचारकै क्रममा मृत्यु भएको धनुषाका प्रहरी निरीक्षक उमाशंकरप्रसाद साहले बताए।
मंसिर २० गते कुस्ती खेलको उद्घाटनका क्रममा नपड्केको पटाका बालकले घरमा लगि खेलाउँदा मंसिर २० गते बिहान बिस्फोट भएको थियो। विस्फोटबाट पेट फुटेर बालक गम्भीर घाइते भएपछि उपचारको लागि धरान लगिएको थियो।
उद्घाटनका क्रममा पटका पड्काउनेहरूको लापरबाहीले बालकले ज्यान गुमाउनु परेको स्थानीयले आरोप लगाएका छन्।