तीन प्रदेशका पाँच जिल्लाबाट आरजुको नाम सिफारिस, कहाँबाट लड्लिन् चुनाव?

विज्ञापन

Share post:

कैलाली । प्रधानमन्त्री शेरबहादुर देउवा पत्नी आरजु राणा देउवाको नाम प्रतिनिधिसभामा पाँच जिल्लाबाट सिफारिस भएको छ । सुदूरपश्चिम प्रदेशको कैलाली ५ र डडेल्धुरा, लुम्बिनी प्रदेशको बाँके ३ र बर्दिया २ तथा गण्डकी प्रदेशको बागलुङ २ बाट उनको नाम सिफारिस भएको हो ।

कांग्रेसमा धेरै जिल्लाबाट प्रतिनिधिसभाको लागि नाम सिफारिस हुनेमा आरजु परेकी छन् । डडेल्धुरा बाहेकका जिल्लामा उनी प्रत्यक्षतर्फ सिफारिसमा परेकी हुन् भने डडेल्धुराबाट उनी समानुपातिकमा परेकी हुन् ।

डडेल्धुराबाट समानुपातिकतर्फ उनको नाम एकल सिफारिस भएको छ भने कैलाली ५ बाट प्रत्यक्षतर्फ पनि राणाको नाम सर्वसम्मत रुपमा सिफारिस गरिएको छ ।

अघिल्लो पटक बाम गठबन्धनबाट उम्मेदवार बनेका नारदमुनि रानासँग प्रत्यक्ष निर्वाचनमा होमिएकी राणा ५ हजार बढी मतले पराजित भइन् । राना २७ हजार २०२ मतसहित विजयी हुँदा राणाले २२ हजार ३२२ मत ल्याएकी थिइन् । अहिले पनि राणाले यो क्षेत्र रोजे उनको प्रतिस्पर्धा रानासँगै हुने देखिएको छ ।

कैलाली ५ यस पटक पनि जोखिम हुन सक्ने भन्दै उनका अगाडि थुप्रै विकल्प राखिएको कांग्रेस वृत्तमा चर्चा हुन थालेको छ । कैलालीमा एकल नाम सिफारिस भएपनि बाँकेमा भने त्यस्तो छैन । यहाँ आरजु देउवा राणासँगै केन्द्रीय उपसभापति पूर्णबहादुर खड्का, सह महामन्त्री किशोरसिंह राठौर लगायतको नाम पनि सिफारिस गरिएको छ ।

गठबन्धनबाट क्षेत्र नम्बर ३ करिब करिब कांग्रेसको ‘पोल्टा’मा पर्ने निश्चित जस्तै भएपछि बाँके ३ बाट चुनाव लड्न केन्द्रीय नेताहरूले इच्छा व्यक्त गरेको बताइएको छ । प्रत्यक्षमा सिफारिस गरिएका अन्य नेताहरूमा बादशाह कुर्मी, आशा विक, मेघराज ओली, लक्ष्मीनारायण शाह, नक्की खाँ, देवबहादुर खत्री, उत्तम राज घिमिरे रहेका छन् । बर्दियामा आरजुसँगै अन्य नेताहरूको नाम पनि सिफारिसमा परेको छ ।

बागलुङ क्षेत्र नं. २ बाट आरजु राणा देउवासहित १० जनाको नाम सिफारिस गरेर पठाएको छ । देउवासहित नेपाली कांग्रेस सभापति जीत शेरचन, गणेश शेरचन, टेकराज पौडेल, देवीप्रकाश भट्टचन, दोर्णकुमार कुँवर, नरबहादुर पुन नीरज, रामप्रसाद आचार्य, डा शान्त राज आचार्य र सिंहबहादुर राणाको नाम सिफारिस गरिएको हो ।

गठबन्धनका कुनै नेतालाई एक क्षेत्रमा पनि सिट सुरक्षित गर्न सकस भइरहेको बेला आरजु राणा देउवाको नाम भने तीन प्रदेशका पाँच जिल्लाले सिफारिस गरेको छ ।

प्रधानमन्त्री तथा कांग्रेस सभापतिकै श्रीमती भएका कारण धेरै ठाउँबाट उनलाई सिफारिस गरिएको कांग्रेस नेताहरू बताउँछन् । अहिले सम्म उनले पाँच क्षेत्रमध्ये कुन क्षेत्रबाट लड्ने आधिकारिक बताएकी छैनन् । तर, उनी निकटका नेता कार्यकर्ताहरू भने अघिल्लो पटक पराजित भएको क्षेत्रबाटै यस पटक उम्मेदवारी दिने मनसायमा रहेको बताउँछन् ।

ताजा समाचार